:-) السلام عليكم جميعا
مش عارف ابتدى الكلام منين واوصل بيه لفين ... بس يعنى زى ما بيقولوا اول الغيث قطره ... و لازم ابتدى كلامى بتعارف مين انا ؟؟ .. وليه واخد من وقتكوا وواخد من وقتى وفارد صفحه مخصوصه بكتب فيها عن حاجات ومحتاجات ... ليه بحط دماغى على صفحات وفى كلمات ... وانا لا فقيه ولا شاعر او كاتب ...
بس انا مجرد عبد لله ... انسان متواضع مثل بقية عباد الله فى الارض ... كنت من فتره بسيطه جدا انسان بيتخبط فى غياهب الدنيا ... مش عارف انا جاى منين ولا رايح فين ... ومكنش عندى اى ارض ثابته اقف عليها ... كان اى حاجه ممكن اؤمن بيها ... افكر فى نفس لحظة ايمانى بيها واقول لنفسى انى ممكن اغير راى فى اى وقت من الاوقات ... ممكن بعد ربع ساعه ايمانى كله يتغير ... للاسف مكنش عندى اى ارض ثابته اقف عليها ...واكيد ... لازم الحاله دى تورث نوع من عدم الاستقرار واللخطبه ... انا ليه وجاى هنا اعمل ايه ؟؟
وطبعا كاى بنى ادم كنت بدور على راحت بالى وسعادتى بشتى الطرق وبكل المحاولات انا جربت كل شىء ممكن تقوم عليه التجربه ... حاولت بكل جهدى ووسعى انى اوصل بس للاسف كل محاولاتى باءت بالفشل ... ساعات كنت بوصل لاستقرار لحظى ... بس بعد مده اكتشف انه غير ثابت وانه مجرد سراب واحساس وهمى سرعان ما يزول ...
بس فجأة سبحانك ياربى قادر على كل شىء عز وجل ... الطريق تكشف قدامى ... انا كنت ناسى ربنا تماما ... يمكن انا كنت فاكر ربنا وعارف ان الطريق ده هو الصح .. بس كانت مجرد معرفه مطموسة الملامح ... زى مسلمه قديمه راسخه جوايا رسوخ التاريخ ان ده هو الصح من غير مانا اكتشفها بنفسى ... و اكيد بما انى مكنتش بتحرك فى الاتجاه ده تماما وكنت جاهل كلية بدينى وربى ورسولى .. كانت المسلمه دى والفطره اللى ربى فطرنى عليها اتغطيت بمئات الاطنان من التراب لحد ما اختفت ملامحها ...
بس " انك لا تهدى من احببت ولكن الله يهدى من يشاء " سبحانه ... ربنا هو اللى شدنى اليه .. الحمد لله رب العالمين ... وفجاة لقيت كل حاجه بتتضح فى دنيتى ... والمعالم كلها بتصفو وتسمو ... كل شىء بقى مشرق ومنير ... والدنيا بدأت يبقى ليها معنى ومغزى وهدف محدد اقدر امشى عليه واوصله ... ولاول مره فى حياتى وصلت وفهمت يعنى ايه استقرار نفسى ... وعرفت ان الله سبحانه كل ما قرت ليه خطوه كل ما السكون النفسى زاد وصبرى على بلاء الدنيا يزيد وتعلقى بيها يخف ... وتعلقى بالجنه يكبر ويعلى .. :-))
انا دلوقتى اصبح شاغلنى حلم ... وهدف مهم ... ازاى اقدر اعمل حاجه يبقى ليها قيمه وممكن ترفع من امتنا وازاى اقدر اوصل للناس اللى انا حسيته ده ... انا مش شيخ ولا داعيه انا عارف ... بس اسلامنا امرنا بكده اننا لازم نوصل دينا وفكرنا للناس اللى حوالينا ولازم كل الناس يساعدوا بعض على قد ما يقدروا .. هى دى الطريقه الوحيده اللى ممكن ينصلح بيها حالنا ...
المشكله اللى واجهتنى يا جماعه ان احنا واقعين بين طرفين ... بين غلو وتفريط ... وده راى الخاص ...
فى وقتنا هذا اصبح مفهوم التدين والقرب لله عند ناس عباره عن قيود تمسك الواحد ... فابصح والاقى بعض دعاة الحريه - مش كلهم اكيد - يدعون للحريه من مفهوم عجيب بيشيل الدين من المنظور الحياتى للانسان .. وكأن المفروض اننا نقصر الدين على انه يكون فى دور العباده وبس .. والاقى فى بعض الاحيان ناس بدأت تاخد مفاهيم من اسلامنا وتسيب مافهيم تانيه منه على هواهم ... وكأن جزء من القراّن من ربنا والجزء الاخر لأ !! بس انان فهمت بعد فترة ... ان السبب الاكبر اللى بيخلى التصور ده قائم عند بعض الناس هو الجهل بدينا وجهل بمعرفتنا بيه ... ولازم نعترف ان معظمنا ضعيف جدا ويمكن لا يفقه شىء اكتر من بعض الاشياء اللى اتعلمناها فى المدرسه واحنا صغيرين وصلاته وصومه وبس !!
وان برضه ساعات الشيطان بيزين للناس اكبر واحب الذنوب اليه وهو الكبر على الله سبحانه وتعالى عما يصفون .. والكبر هو احد انواع الشرك بالله ... وفى خضم ذلك نسيوا الناس ان دينا ده هو اللى اللى عمل مساواه بين العبيد والاحرار ... ورفع من قدر المرأه اللى كانت فى عصر الجاهلية بتعامل معامله سيئه جدا توصل لدرجة الوأد والدفن حيا ..واصبح اكبر خدعه بتمارس على العقول ان ده مش الدين ... وان اى حد من حدود الله ممكن متعجبهمش هى عادات قبليه مدسوسه ... وان ربك رب قلوب ... ازاى اصلى وواقرا القراّن كل صلاه وانا ممكن اكون فى قرارة نفسى مش مصدق ببعض اللى جه فيه من كلام الله سبحانه وتعالى ... وازاى اتخيل ان المنهج الربانى اللى نازل من رب السماء مش هو المنهج اللى فيه خلاصنا وحريتنا وسعادتنا .. وأؤمن بمنهج واضعه حد من البشر
ومن منطلق اخر ... فى نوع من المتدينين ... وانا بتكلم عن ناس اجلهم واقدرهم واحفظ لهم كل تقدير وحب .. وانا على علم ان كل واحد بيحاسب على ما نوى .. وانهم بيجتهدوا وبيحبوا اسلامنا ... بس شايف انهم مش قادرين يوصلوا لقلوب الناس ... او يوصول الاسلام لقلوبهم ... واحنا فى امس الحاجه اننا نفتح القلوب اللى مش شايفه فى عصرنا المادى البحت ده .... وانهم اكتر الوقت بيجنحوا لكريقة الترهيب من ربنا وناسيين الترغيب وان حب الله هو اهم طريق نوصل بيه للجنه .. وان سيدنا محمد - عليك افضل الصلاة والسلام يا حبيب الله - اكتسب قلوب اكتر الناس وجذبهم للاسلام لانه كان رحيم بيهم ولين فى قوله ... و انهم لازم يكلموا كل الناس ... حتى لو شايفين ان ده كذا او ده كذا .. او ده بيعمل كذا وكذا .. لازم نبص لكل الناس ..
ولازم نفتكر ان اغلبنا كان فى وقت من الاوقات اكتر هبوطا من الشخص اللى ممكن هو بيبصلوا دلوقتى بنظره متعاليه ... واننا لازم نبطل فكرة الخلاص الفردى .. وهو انى الحق نفسى وشوية ناس بسيطه حواليه وخلاص ... ومش قادر يبص للموضوع بمنظور شمولى ... ومش قادر يفهم ان لازم جنب رقائق الدين وفروعه لازم نهتم باصوله الاول .... وعدم التركيز على جهه بشكل مستمر واننا نسيب الاصل نفسه بايظ
لازم افكر بمنهج شمولى ... لازم ابص للغالبيه العظى من الناس ازاى اقدر احركهم .. ازاى اقدر ارفع من بلادى ككل ومن امتنا .. ازاى اقدر احرك مشاريع تنمويه وصناعات .. واننا نعمل تبادل حضارات بينا وبين الغرب نصلح بيها من مفوم دينا ... واننا لازم نفكر بشكل متطور مواكب للعصر اللى احنا فيه عشان نقدر نجذب عقول الناس اللى اصبحت فى ماديه كاسحه فى يومنا هذا ...
ولازم نفكر ان فيه طرق لازم نستخدمها زى الفن .. يعنى ماينفعش اقعد اقول الفن حرام الفن حرام وخلاص ... انا بقول بدل مانحرم الفن نستخدمه كسلاح لينا ... ندعم الفن الملتزم .. والفن اللى ليه هدف بدون اخلال بشريعة ربنا ولا التفريط فى حدوده ... وان الفن ممكن يكون سلاح امض من الدبابات فى العصر اللى احنا اصبحنا فيه واعالم كلنا قريه واحده زى ماديما بيقولوا
ده حلمى يجماعه ... حلمى اننا نقدر نقضى على اكبر اّفه بتواجهنا وهى الجهل ... لازم نبتدى ندور ونبص ... لازم نقرى عن دينا وعن نبينا الكريم ... لازم نبتدى نتفقه فى دينا اللى نسيناه نحفظ قراّنا وسنة نبينا ... لازم نتحرك ونعمل مشروعات تنمويه ونبص للناس اللى حوالينا ... نشوف الاطفال اللى فى الشوارع .. نشوف المحتاجين والفقرا ...نحاول نبص للقدس والعرق ولبنان من اكتر من مجرد خبر فى نشره او جرنال نتألم لحظه لسماعه وبعدين ننسى عنه تمام ... نحاول نتخلى عن انانيتنا شويه و نخلى من دنيتنا دى مهمه مزدوجه نصلح بيها من امتنا وتكون فى نفس الوقت باب لينا نوصل بيه لدار الخلد الجنه يارب اللهم امين
ربنا يوصلنا للجنه ويقدرنا على فعل الخير ونشر كلمة دينا ومحو اميتنا بيه ...وندخل الجنه كلنا ايدنا فى ايد بعض ونتمتع برضوان الله والتطلع الى وجهه الكريم سبحانه عز وجل ونشرب من الحوض الشريف مع سيدنا محمد افضل الخلق اجمعين عليه افضل الصلاة والسلام اللهم امين ، يارب قدرنا عليها يارب
:-) والسلام ختام
